Неделя апостола Фомы
Тропарь, глас 7:
Запеча́тану гро́бу, / Живо́т от гро́ба возсия́л еси́, Христе́ Бо́же, / и две́рем заключе́нным, / ученико́м предста́л еси́, / всех Воскресе́ние, / дух пра́вый те́ми обновля́я нам, / по вели́цей Твое́й ми́лости.
Кондак, глас 8:
Любопы́тною десни́цею / жизнопода́тельная Твоя́ ре́бра Фома́ испыта́, Христе́ Бо́же, / созаключе́нным бо две́рем я́ко вшел еси́, / с про́чими апо́столы вопия́ше Тебе́: / Госпо́дь еси́ и Бог мой.
Прокимен, глас 3:
Ве́лий Госпо́дь наш, и ве́лия кре́пость Его́, / и ра́зума Его́ несть числа́.
Причастен:
Похвали́ Иерусали́ме Го́спода, / хвали́ Бо́га твоего́ Сио́не.
Неделя святых жен Мироносиц
Тропари, глас 2:
Егда́ снизше́л еси́ к сме́рти, Животе́ Безсме́ртный, / тогда́ ад умертви́л еси́ блиста́нием Божества́; / егда́ же и уме́ршия от преиспо́дних воскреси́л еси́, / вся Си́лы Небе́сныя взыва́ху: / Жизнода́вче, Христе́ Бо́же наш, сла́ва Тебе́.
Слава: Благообра́зный Ио́сиф, / с Дре́ва снем Пречи́стое Те́ло Твое́, / плащани́цею чи́стою обви́в, и благоуха́ньми, / во гро́бе но́ве, покры́в, положи́, / но тридне́вен воскре́сл еси́, Го́споди, / подая́й ми́рови ве́лию ми́лость.
И ныне: Мироно́сицам жена́м при гро́бе предста́в А́нгел, вопия́ше: / ми́ра ме́ртвым суть прили́чна, / Христо́с же истле́ния яви́ся чуждь. / Но возопи́йте: воскре́се Госпо́дь, / подая́й ми́рови ве́лию ми́лость.
Кондак, глас 2:
Ра́доватися мироно́сицам повеле́л еси́, / плачь прама́тере Е́вы утоли́л еси́ / Воскресе́нием Твои́м, Христе́ Бо́же, / апо́столом же Твои́м пропове́дати повеле́л еси́: / Спас воскре́се от гро́ба.
Прокимен, глас 6:
Спаси́, Го́споди, лю́ди Твоя́, / и благослови́ достоя́ние Твое́.
Причастен:
Те́ло Христо́во приими́те, / исто́чника безсме́ртнаго вкуси́те.
Хвали́те Го́спода с Небе́с, / хвали́те Его́ в вы́шних.
Неделя о расслабленном
Тропарь воскресный, глас 3:
Да веселятся Небесная, / да радуются земная; / яко сотвори державу / мышцею Своею Господь, / попра смертию смерть, / первенец мертвых бысть;/ из чрева адова избави нас, / и подаде мирови велию милость.
Конда́к Неде́ли о рассла́бленном, глас 3:
Ду́шу мою́, Го́споди, во гресе́х вся́ческих,/ и безме́стными дея́ньми лю́те разсла́блену,/ воздви́гни Боже́ственным Твои́м предста́тельством,/ я́коже и разсла́бленнаго воздви́гл еси́ дре́вле,/ да зову́ Ти, спаса́емь:// Ще́дрый, сла́ва Христе́, держа́ве Твое́й.
Прокимен, глас 1:
Бу́ди Го́споди ми́лость Твоя́ на нас, / я́коже упова́хом на Тя.
Причастен:
Те́ло Христо́во приими́те, / исто́чника безсме́ртнаго вкуси́те.
Хвали́те Го́спода с Небе́с, / хвали́те Его́ в вы́шних.
Преполовение Пятидесятницы
Тропарь, глас 8:
Преполови́вшуся пра́зднику, / жа́ждущую ду́шу мою́ благоче́стия напо́й вода́ми, / я́ко всем, Спа́се, возопи́л еси́: / жа́ждай да гряде́т ко Мне и да пие́т./ Исто́чниче жи́зни на́шея, Христе́ Бо́же, сла́ва Тебе́.
Кондак, глас 4.
Пра́зднику зако́нному преполовля́ющуся, / всех Тво́рче и Влады́ко, / к предстоя́щим глаго́лал еси́, Христе́ Бо́же: / прииди́те и почерпи́те во́ду безсме́ртия. / Те́мже Тебе́ припа́даем и ве́рно вопие́м: / щедро́ты Твоя́ да́руй нам, / Ты бо еси́ Исто́чник жи́зни на́шея.
Прокимен, глас 3:
Ве́лий Госпо́дь наш, и ве́лия кре́пость Его́, / и ра́зума Его́ несть числа́.
Причастен:
Яды́й Мою Плоть, и пия́й Мою́ Кровь, во Мне пребыва́ет, и Аз в нем, рече́ Госпо́дь.
Неделя пятая, о самаряныне
Тропарь воскресный, глас 4:
Све́тлую Воскресе́ния про́поведь / от А́нгела уве́девша Госпо́дни учени́цы / и пра́деднее осужде́ние отве́ргша, / апо́столом хва́лящася глаго́лаху: / испрове́ржеся смерть, / воскре́се Христо́с Бог, / да́руяй мiрови ве́лию ми́лость.
Кондак, глас 8.
Ве́рою прише́дшая на кла́дязь самаряны́ня, / ви́де Тя прему́дрости во́ду, / е́юже напои́вшися оби́льно,/ Ца́рствие вы́шнее насле́дова ве́чно, я́ко присносла́вная.
Прокимен, глас 3:
По́йте Бо́гу на́шему, по́йте, / по́йте Царе́ви на́шему, по́йте.
Причастен:
Те́ло Христо́во приими́те, / исто́чника безсме́ртнаго вкуси́те.
Хвали́те Го́спода с Небе́с, / хвали́те Его́ в вы́шних.
Неделя шестая, о слепом
Тропарь воскресный, глас 5:
Собезначальное Слово Отцу и Духови, / от Девы рождшееся на спасе́ние наше, / воспоим, вернии, и поклонимся; / яко благоволи плотию взыти на Крест, / и смерть претерпети, / и воскресити умершия / славным Воскресе́нием Своим.
Кондак, глас 4.
Душе́вныма очи́ма ослепле́н, / к Тебе́, Христе́, прихожду́, / я́коже слепы́й от рожде́ния, / покая́нием зову́ Ти: / Ты су́щих во тьме Свет пресве́тлый.
Прокимен, глас 8:
Помоли́теся и воздади́те / Го́сподеви Бо́гу на́шему.
Причастен:
Те́ло Христо́во приими́те, / исто́чника безсме́ртнаго вкуси́те.
Хвали́те Го́спода с Небе́с, / хвали́те Его́ в вы́шних.
Неделя седьмая по Пасхе, святых отец I Вселенскаго собора
Тропарь воскресный, глас 6.
И святым отцам тропарь, глас 8:
Препросла́влен еси́, Христе́ Бо́же наш, / свети́ла на земли́ отцы́ на́ша основа́вый, / и те́ми ко и́стинней ве́ре вся ны наста́вивый, / Многоблагоутро́бне, сла́ва Тебе́.
Кондак отцем, глас 8.
Апо́стол пропове́дание и оте́ц догма́ты, / Це́ркви еди́ну ве́ру запечатле́ша, / я́же и ри́зу нося́щи и́стины, / истка́ну от е́же свы́ше богосло́вия, / исправля́ет и сла́вит благоче́стия вели́кое та́инство.
Прокимен, глас 4, песнь отцев:
Благослове́н еси́, Го́споди Бо́же оте́ц на́ших, / и хва́льно и просла́влено И́мя Твое́ во ве́ки.
Причастен:
Хвали́те Го́спода с Небе́с, / хвали́те Его́ в вы́шних.
Ра́дуйтеся, пра́веднии, о Го́споде, / пра́вым подоба́ет похвала́.
Троицкая родительская суббота
Тропарь, глас 8:
Глубино́ю му́дрости человеколю́бно вся стро́яй / и поле́зное всем подава́яй, / Еди́не Соде́телю, упоко́й, Го́споди, ду́ши раб Твои́х, / на Тя бо упова́ние возложи́ша, / Творца́ и Зижди́теля и Бо́га на́шего.
Богородичен, глас тойже:
Тебе́ и Сте́ну и Приста́нище и́мамы, / и Моли́твенницу благоприя́тну к Бо́гу, / Его́же родила́ еси́, Богоро́дице безневе́стная, ве́рных спасе́ние.
Кондак, глас 6:
Со святы́ми упоко́й, / Христе́, / ду́ши раб Твои́х, / иде́же несть / боле́знь, ни печа́ль, / ни воздыха́ние, / но жизнь безконе́чная.
Прокимен, глас 6:
Ду́ши их / во благи́х водворя́тся.
Причастен:
Блаже́ни, я́же избра́л и прия́л еси́ Го́споди, / и па́мять их в род и род.
Неделя первая по Пятидесятнице, всех святых
Тропарь воскресный, глас 8.
И всем святым тропарь, глас 4:
И́же во всем ми́ре му́ченик Твои́х, / я́ко багряни́цею и ви́ссом, / кровьми́ Це́рковь Твоя́ украси́вшися, / те́ми вопие́т Ти, Христе́ Бо́же: / лю́дем Твои́м щедро́ты Твоя́ низпосли́, / мир жи́тельству Твоему́ да́руй, / и душа́м на́шим ве́лию ми́лость.
Кондак, глас 8:
Я́ко нача́тки естества́, Насади́телю тва́ри, / вселе́нная прино́сит Ти, Го́споди, богоно́сныя му́ченики, / тех моли́твами в ми́ре глубо́це / Це́рковь Твою́, жи́тельство Твое́, Богоро́дицею соблюди́, Многоми́лостиве.
Прокимен, глас 8:
Помоли́теся и воздади́те / Го́сподеви Бо́гу на́шему.
И святым, глас 4:
Ди́вен Бог во святы́х Свои́х, Бог Изра́илев.
Причастен:
Хвали́те Го́спода с Небе́с, / хвали́те Его́ в вы́шних. Ра́дуйтеся, пра́веднии, о Го́споде, / пра́вым подоба́ет похвала́.
Неделя вторая по Пятидесятнице,
всех святых, в земле Российской просиявших
Тропарь и кондак воскресный, глас 1
И святым тропарь, глас 8:
Я́коже плод кра́сный Твоего́ спаси́тельнаго се́яния,/ земля́ Росси́йская прино́сит Ти, Го́споди, вся святы́я, в той просия́вшия. / Тех моли́твами в ми́ре глубо́це / Це́рковь и страну́ на́шу Богоро́дицею соблюди́, Многоми́лостиве.
Кондак, глас 3:
Днесь лик святы́х, в земли́ на́шей Бо́гу угоди́вших, предстои́т в Це́ркви / и неви́димо за ны моли́тся Бо́гу. / А́нгели с ним славосло́вят, / и вси святи́и Це́ркве Христо́вы ему́ спра́зднуют, / о нас бо мо́лят вси ку́пно / Преве́чнаго Бо́га.
Прокимен, глас 1:
Бу́ди, Го́споди, ми́лость Твоя́ на нас, / я́коже упова́хом на Тя.
И прокимен святых, глас 4: Святы́м, и́же суть на земли́ Его́, / удиви́ Госпо́дь вся хоте́ния Своя́ в них.
Причастен: Хвали́те Го́спода с Небе́с, / хвали́те Его́ в вы́шних. Благоволи́т Госпо́дь в лю́дех Свои́х/ и вознесе́т кро́ткия во спасе́ние.
Здесь Вы можете скачать и распечатать тексты в одном файле:
Загрузка ...